خطوات علمية لكتابة الشعر....

نعم تقدر




وهذا هو موضوعنا هالمره


واهو خطوات عمليه لكتابة الشعر
( وانا بطبيعة الحال افترض انك خلاص استوعبت اللي بالموضوع)

خلنا اول شي نتفق علي هالامر واللي اهو

ان القصيده قسمين


1-الفكره (خمسين بالميه )

2- الصياغه والوزن والقافيه و .......الخ ( خمسين بالميه )

!!!!

هذا اللي انا شايفه


مسألة الفكره ما اقدر اسوي فيها شي
هذي ترجع لك انت
وترجع لحياتك وترجع للموضوع اللي تبيه



ولكن الامور الثانيه ممكن نتعامل وياها

ــــــــــــــــــــــــــــــــــــــــــــــــــ ـــــــــــــــــ

الكتابه العمليه للشعر

وهالموضوع راح نقسمه لمرحلتين


1- الاستعداد والتدريب

2- مباشرة الكتابه
ـــــــــــــــــ

المرحله الاولـــــى:

1- الاستعداد والتدريب

لما تبي تلقي محاضره او درس عن القدس مثلا
لازم تقرا تاريخ القدس
وتقرا السياسه وتجهز امورك ..... صح ؟!!!؟؟!


قبل لانكتب



ياليت اتحاول قد ماتقدر تسوي هالامور :

1 - اقرا شعر فصيح
( اول شي لااحمد شوقي والشعراء اللي عاصروه وبعدين اقرا المعلقات حتى لو مافهمتها )


2 - اقرا واسمع لهالشعراء
(فزاع - حامد زيد- خالد الفيصل - محمدبن راشد المكتوم - سعود بن بندر - عبدالله الفيصل - مرشد البذال - طلال السعيد )
بس هذولا وانا مختارهم بالذات متعمد مو معناتها مافيه غيرهم لا فيه
و يمكن افضل بس ابيك تسمع كلامي
واعتمد


وارجووووك
اترك شعراء هاليومين لانهم راح يخربون مستواك
( شعراء هاليومين ذبحونا بهالكلام
لنعنبوها ولنعنبو جدها ويلعن خيرها والله ياخذ خالتها....
مادري أي غزل كله شتايم
شوي ويقولون يابنت ...... المهم )





3- درب نفسك علي كتابة الشعر !!

شلون ؟!
انا اعطيك هالطريقه وحاول تسويها

اختار اي بيت شعر وحاول تكتب علي نفس منواله

وعلشان تسهل الامر علي نفسك
اكتب الكلمات اللي تخدم قافيتك براس الصفحه عشان تكون حاضره قدامك


مثال :
والبيت لسعود بن بندر الله يرحمه





ياليتني بينـك وبيـن المضـره
من غزة الشوكه الي سكرة الموت





براس الصفحه اكتب الكلمات اللي تساعدك

مضره : مسره - مبره - جره - مره - مجره .......الخ

موت : فوت - صوت - حوت - قوت - مكبوت - .........الخ


واقعد ركب





ناديتلـك ياغايتـي الـف مــره
وان فات فينا الفوت ماينفع الصوت

ماشفت ياعمري بعمـري مسـره
والضيم فيني طول الازمان مكبوت


وهلم جره



تحدى نفسك بالكتابه وحاول تكتب 4 او 5 ابيات نفسه
واذا خلصت اختار بيت غيره واكتب علي شاكلته
( وكرر هالعمليه لان الممارسه مهمه)


ـــــــــــــــــــــــــــــ

المرحله الثانيه :



قول باسم الله


قبل لاتبدأ


- تاكد انك اذا لقيت الفكره ف خمسين بالميه من القصيده خلص

- حط في بالك ان الكتابه امرها سهل مو شي معقد

- اعتقد وامن بانك تقدر تكتب شعر

- تأكد ان المساله مو الهام او وحي ينزل عليك

كل المساله حاله من الاستعداد الذهني والنفسي والعاطفي
فهيئ الجو المناسب للكتابه بعدين راح تلقا الامر عادي
يعني جو الهدوء والمكان الحلو والبراد ...

وصدقني مساله الجو المناسب بعدين تصير مالها داعي
يعني انا
ما اكتب الا وعندي ناس مزعجين يسولفون
او وانا اطالع مباراة كره قدم


المهم


صل علي النبي



2- مباشرة الكتابه

أ - الكتابه الاوليه
ب - تعديل المعاني
ج - ضبط القافيه
د - ضبط الوزن
ه -اعتماد القصيده


وراح نتكلم عن كل نقطه بروح :


أ - الكتابه الاوليه
(اكتب بالفكره اللي تبيها و لاتعقد الامور
ولا تركز حيل علي المعاني لكن حاول تكتب اللي في بالك
وحاول تسترسل قد ماتقدر
وكثر ماتستبسط الامر راح تلقاه بسيط )





ب - تعديل المعاني
( يعني مثلا لاتذكر المؤنث او تأنث المذكر ولاتجمع المفرد او تثني الجمع
وانتبه للمعني اللي انت كتبته مو المعني اللي في بالك )


ج - ضبط القافيه
( والقافيه تكون من حرفين او ثلاثه في الغالب
وانتبه للتشكيل
مثلا كلمه يختلف بكسر اللام وكلمة اختلف بفتح اللام !!
صحيح ان اخر ثلاث حروف نفس الشي بس التشكيل للحرف اللي قبل الاخير عفس الدنيا وخلاهم مايضبطون .
و ممكن تتبع الطريقه اللي قبل شوي
انك تكتب الكلمات اللي تساعدك براس الصفحه وتستخدم هالكلمات )

د - ضبط الوزن
( مسالة ضبط الوزن راح تكتسبها مع الممارسه
لكن الحين حاول تغنيها بنفس اللحن راح تجي معاك
و بالموضوع الاول سولفنا عنها وراح انتوسع فيه مستقبلا اذا الله اراد )


ه -اعتماد القصيده
( اذا كتبت قصيده واعجبتك اكتبها وانساها علي الاقل اسبوع وبعد الاسبوع اقراها
طبق هالمسأله ولا راح تندم صدقني )




ــــــــــــــــــــــــــــــــــــ

وانت تكتب

- حاول تبتعد عن القوافي الصعبه لانها راح تأذيك


- ولاتستعجل مسالة اتقان الوزن كل شي بالممارسه



بعد ماتكتب

- ابحث عن اخطاءك وانقد نفسك بنفسك

- قارن أي قصيده تكتبها بقصيده مشابهه لها


- اعرض محاولاتك علي ناس تثق انهم ينصحونك ولاتزعل من النقد
ومو بالضروره ان اللي ينقدك شاعر يكفي أي متذوق للشعر انه ينقدك
اهم شي يكون صادق

(وللعلم النقد فيه بناء وفيه غير بناء
البناء هو اللي يقولك عندك خطا كذا وكذا ويبين شنو الخطا ووين صايراذا قدر
والغير بناء اهو اللي يقولك انت عندك اخطاء
ولايقول شنو او يقول لا فيها نواقص ولا يبين او يقول شنو هالنواقص )


شوف




القصيده اساسها الفكره

فاذا الفكره اخذت 4 ابيات في التعبير عنها

ف هالاربعه كفايه مو بالضروره اتمطط الفكره عشان اتصير طويله


عط كل شي قدره

 

 

يعطيك العافية اخي

اتمنى من الجميع الاستفادة

ولا تحرمنا من ابداعتك

 

 

المشاركة الأصلية كتبت بواسطة alhussin

يعطيك العافية اخي

اتمنى من الجميع الاستفادة

ولا تحرمنا من ابداعتك

الله يعافيك ومشكور لتصفحك للموضوع ولك مني اجمل تحية

 

 

شـكــ وبارك الله فيك ـــرا لك ... لك مني أجمل تحية .

 

 

انا اقبل الموضوع كا فكره بس صراحه هل انت تنتقد شعار المنتدي شفت منهم هفوات لا سمح الله انا عن نفسي اقبل انقدك بس الى اعرفه ياخي الكريم منت بشاعر ولا ناقد او تنتقد شعراشقر او الغزل او النظم او الشعرا عامه الخلاصه هاذا لا يمد لاشقر بي صله جمله وتفصيلا الشعر ياخي الحبيب عصا رة افكار طيب ان معك لا اهظم حقك مجار بس تخيل في قارعه او محاوره في حفله تلاقي كل شاعر بدفتره مره ماتجي يمكن انت قصدك الي يبي يتعلم شعر النظم او الغزل حبيبي ابو نائف( فاقد اشي لا يعطيه) مهمى تكتب تمل تزهق اذا الواحد ماهو بشاعر بس يحاول ان يكتب مره او مرتين , علي فكره انا معجب بمواضيعك وهاذا لا يقلل من ابداعك ولا يقلل منها او يقلل من اعجابي بقلم ابو نائف
تحيا تي لك

 

 

المشاركة الأصلية كتبت بواسطة وائل

شـكــ وبارك الله فيك ـــرا لك ... لك مني أجمل تحية .

ويبارك فيك يالغالي ومشكور لمرورك العطر وتحياتي لك وللجميع

 

 

المشاركة الأصلية كتبت بواسطة الشاهين

انا اقبل الموضوع كا فكره بس صراحه هل انت تنتقد شعار المنتدي شفت منهم هفوات لا سمح الله انا عن نفسي اقبل انقدك بس الى اعرفه ياخي الكريم منت بشاعر ولا ناقد او تنتقد شعراشقر او الغزل او النظم او الشعرا عامه الخلاصه هاذا لا يمد لاشقر بي صله جمله وتفصيلا الشعر ياخي الحبيب عصا رة افكار طيب ان معك لا اهظم حقك مجار بس تخيل في قارعه او محاوره في حفله تلاقي كل شاعر بدفتره مره ماتجي يمكن انت قصدك الي يبي يتعلم شعر النظم او الغزل حبيبي ابو نائف( فاقد اشي لا يعطيه) مهمى تكتب تمل تزهق اذا الواحد ماهو بشاعر بس يحاول ان يكتب مره او مرتين , علي فكره انا معجب بمواضيعك وهاذا لا يقلل من ابداعك ولا يقلل منها او يقلل من واعجابي بقلم ابو نائف
تحيا تي لك

مشكور يا أخي الشاهين لمرورك العطر للموضوع اولاً
ثانياً: ياليت كل الردود مثل ردك للموضوع حتى نستفيد من بعضنا في النقاش
ثالثاً:انا لست بشاعر صحيح ولكن من هواة الشعر ولكن اكتب بعض الخواطر او القصائد القصيرة(يعني محاولات خجولة واحتفظ بها لنفسي)
رابعاً: كتبت الموضوع كفكره لا أقل ولا أكثر(لا نقد ولايحزنون)
خامساً: اعجبتني بقولك كل شاعر بدفتره (رجل مرور ويعطي قسائم ماصار شاعر)هههههههه
سادساً: اجددشكري لك لمرورك للموضوع لك مني اجمل تحية