قلطه (شقر )بين الشاعر ابراهيم الشيخي والشاعر سعيد الفهري

ســعـــيـــد الـــفـــهـــري

يا مرحبا بالشاعر اللي يسبح بحـور الشقـر
ويلاطم الامواج فـي جـزر البحـور ومدّهـا
كلّه على شان الخدود الحمر واهـداب الشقـر
وكفوف ذهّبهـا وكنّـه بالذهـب مـا مدّهـا

ابــراهـــيـــم الــشــيــخــي

الك البقا يالشاعر اللي زيـن منطوقـك يسـر
ان كان قدمت الدها تلقى الدها وتـرى الدهـا
ان كان وانك خاتمك فضـة ومسباحـك يسـر
ماني مصافحك بيـدي وانتـه يديـك تردهـا

ســعـــيـــد الـــفـــهـــري

الفارس المشهور يا ابراهيـم لـوّح بالنصـر
حوّل على ذيك البيـوت اللـي تهـاز وهدهـا
والمشعل اللي كان فالاهلي وسجـل بالنصـر
كانـت عقـود الاغنيـا فيديـه لكـن هدهـا

ابــراهـــيـــم الــشــيــخــي

ما كل من قصّر ثيابه صـار مهـدي منتظـر
لابدهـا تظهـر معـالـم كذبـتـه لابـدهـا
ياسعيد قل ل(المشعل)الله لايضرك منـت ضـر
بغيـت كبـد المنيبـة مانـاشـك الا بـدهـا

ســعـــيـــد الـــفـــهـــري

المجد لاهل الطيب واصحاب المعالـي والذكـر
الرجـل منهـم لـو يوقـف للـوازم سدهـا
واللي خرج لك من بطن الانثى ومن ظهر الذكر
ما تمنعك منـه جبـال تلتجـي فـي سدهـا

ابــراهـــيـــم الــشــيــخــي

راع الشداد اللي شداده صـار مدعـاة الفخـر
بكـرة ذلولـه ترمحـه والا يميـل شـدّهـا
ياكم جبل عقب ارتكازه صابتـه رجفـه فخـرّ
ترى الجبال انـواع وجبـال السـراه آشدهـا

ســعـــيـــد الـــفـــهـــري

راع الشداد المقتدي بالمصطفـى وابـو بكـر
يكسر جيوش الفرس بافكـاره ويلعـن جدهـا
فكر ملوّثه الشقـا وافكـار لـو تربـو بكـر
وافكـار تحتـار الرجـال بمزحهـا وبجدهـا

ابــراهـــيـــم الــشــيــخــي

اجل تحيزم للجهاد ان كان فـي راسـك ظِفـر
الهرج مايصنع لـك سيـوف ويبـرّع حدهـا
لا ياالعبيدي لو نزعت اللحـم عقّيـت الظفـر
وش دخّلك في ناس حـدّك مايجـاور حدهـا

ســعـــيـــد الـــفـــهـــري

الصقر محزمه الجناح ومنزلـه ضلـع ووكـر
وان جاك بالصيده فعـش الربـع والا غدّهـا
والمعركه رجل وحصان وصـارم وفـر وكـر
واللي تمضّي يومهـا يصبـح عليهـا غدّهـا

ابــراهـــيـــم الــشــيــخــي

ياهل الصقور صقور هذا الوقت ما منها خطـر
امـا لطمنـا عينهـا والا لطمـنـا خـدهـا
اللي على بالك خطر واللي على بالـي خطـر
مثبوت فالتاريـخ وحقـوق التواريـخ أدّهـا

ســعـــيـــد الـــفـــهـــري

الجود في حاتم طبع والعدل خصله فـي عمـر
نفس (ن)تكّد وتجتهد ربـك ماضيّـع كدّهـا
ان قوّم الله حظّكم يـا قـوم واعطاكـم عمـر
عقيدكم يرفـع يديـه وشوشتـه مـا كدّهـا

ابــراهـــيـــم الــشــيــخــي

اصابع ايدك ماتسـاوى والزمـن كلـه عِبـر
والناس لاتفخر بلبـس ثيـاب ماهـي قدهـا
بر الامان الي تشوف احدٍ عثـر واحـدٍ عبـر
ان شفت في نفسك ثقة قـدّ المسيـرة قدّهـا

 

 

محاورة رائعه يعطيك العافيه بالغالي

 

 

حوار رائع بين الشاعرين

شـكــ وبارك الله فيك ـــرا لك ... لك مني أجمل تحية .

 

 

محاورة رائعه والشقر اروع بين الشاعرين

 

 

ابدعواااااااااااااا وصح لسان الشاعرين


والى الامام يابو دبيان


اخوكم البردي