لي عام واكثر مانظمت القصايد= ما كان لي فيها شفوف وهوايات

((( لي عام )))=
لي عام واكثر مانظمت القصايد= ما كان لي فيها شفوف وهوايات
ما ني بنظم الشعر ناقص وزايد= لي في الحياة اهمّ واجلّ رغبات
ولاني من اللي يدورون الطرايد=ان جات والا راحه ان كان ماجات
مرّت سنه وبنات فكري شرايد= ماضاق صدري من غياب النزيهات
واليوم جنّي هبد ذودن ورايد= لا وردنّ لصافي الما مغبّات
لهن يذلّ وينحني كل كايد= لو انه اطول من جبال السراوت
ما ذاع شعري بالصحف والجرايد= باقة خواطر في لفايف بديعات
الى طرت ع البال هلّت فرايد= واستحضرت ما غيّبته السنوات
عمري بلغ سبعين عامٍ وزايد= اخذت من ماضي سنيني دراسات
ما غث صدري ياوساع البنايد= الا قلوبا سود ونفوس شينات
الناس في كثر النصايح زهايد=لكن بكتب حدّ والوقت مافات
هرج القفى مافيه كسب وفوايد=غِيبه تعود على بطلها بويلات
ومن راقب الناس ابتلي بالشدايد= يعيش في الدنيا بهمٍّ وحسرات
ومن طاوع النمام شين العوايد= يملا فؤاده بالحسد والعداوات
يبعده عن ربعه عزاز السنايد=اللي لهم في حزّت الضيق وقفات
والى جلس معهم يعد العدايد=يقل نصحته ما سمع للنصيحات
ورجلا ليا اطروا له كبار الموايد= ماينقصر عنها ولو هي بعيدات
يبغى الظهور وينذكر بالحمايد=مايدري انه نقص باهل المروات
ومن الحمايل ناس صارو مرايد= من اجل زود متابعين السنابات
والشهره اللي من وراها نقايد= ترمي الحموله بين حاقد وشمات
واهل الكذاب مزورين الشهايد=الله خذلهم وختفوا بالشهادات
والحاسد اللي ممتلي بالحسايد=يكره يشوف الناس في خير وغناة
الله يكافينا الخباث الحقايد= ويجعل لهم عن كل مؤمن مصدات
لو يزهد الانسان في عمر بايد=ويبتغي للروح مخرج ومنجاة
وصلاة ربي على النبي خير قايد= ونشكر الخلاق رب السموات
الشيخ أحمد المالكي=

 

 

(((( مجاراة ))))=
سمعت لي شرد بيوتاً جدايد =تستدعي الشاعر لبدع المجاراة
مثل الجواهر والحلي والقلايد=على صدور الطاهرات العفيفات
لطايفٍ متميزاتٍ سدايد=تلك السمان اللي حكمها كثيرات
غنا بها شيخاً وشاعر ورايد=رايد دواوين الادب والثقافات
يحب تاصيل العلوم الوكايد=متميز المعنى بليغ العبارات
ايديه بطناب المعالي جوايد=وبين المشايخ له مواقف وبصمات
لا نشن الرمية يحب الركايد=ومن التجارب مكتسب له مهارات
هذاك ابويحيى سليم العقايد=المثبتة عنده بحاديث وايات
هذا ومن واقع هموم ولهايد=حبيت اجاري طيّب الذكر والذات
لي عام عن حقل القصايد محايد=ماعاد لي طربة على حبك الابيات
ما اظن باقي من حياتي مدايد=بل واعتقد ما باقي الا سويعات
واللي جرا لي من صروف ونكايد=ما تحتملها باثرة هي وابانات
والجرح لو تبطي عليه الضمايد=لا صار ينزف ما تفيد الضمادات
ولا طاب نوم مكبرين الوسايد=اصبح علي الصبح والطرف مابات
تقول في قلبي يمرر حدايد =حدايدٍ في واهج النار محماة
من زود همي والاسى والكمايد=وكروب يتبعها مواجع وتعبات
شايل على كتفي حمولاً ضهايد=ما تحتملها الشمّخ المشمخرات
واللي يبى عيش الرخا والرغايد=انظر لوضعه في نهار الملمات
إن جيت له نيران بيته خمايد =ميت ولا له ساعة الجد وقفات
لو من بديدة من خيار البدايد=ماهو بكفوا للفعول الشريفات
لاشك عن شوفه تجوز الصدايد=بل حط من بينك وبينه مسافات
واقول بتلى القافية والنشايد=هني من غادر جميع المنصات
ما من وراها الا شنار وحصايد=والشين كله والفعول الشنيعات
واصبحت أهني ساكنين اللحايد=اخير من دنيا الفتن والضلالات
جندب المالكي=