كش ياملك -

06-30-2012, 10:45 AM

انا اخوكم الشاعر احمد الهلالي وهذه اول مشاركه لي بينكم وان شالله تكون عربون تعارف
بيني وبين قلوبكم الطاهره مع كل تقديري للجميع

ليت الزمان يعود والوقت يندار=وترجع ليالي الحب والشوق والخوف
ادري تفارقنا بلا سابق انذار=والحزن مابين المحاديب معزوف
نرمي مواجعنا على درب الاقدار=لو السبب معروف ماهوب معروف
معك عرفت اني طفل لكن يغار=بكل مايملك من الحس والشوف
حتى تعلم كيف تنميق لاعذار=واصبح يتمتم شعر ويرتب حروف
تقول(خاين) بس والله ماصار=لوكان هذا الدرب لناس مألوف
وانا السماح اللي رفض ياخذ الثار=مع ان في يده منابيل وسيوف
بس المصيبه وصمة الذل والعار=والعذر بين شفاي حاير ومكتوف
ياما ابتكرت افكار وافكار وافكار=خزنة بنوك وشيك لرضاك مصروف
ان قلتي ارحب جيتلك وسم وامطار=وان قلتي ابعد جيت ميت وملهوف
في الحالتين احس بك ليل والنهار=شعر كتبني لك على قافية اوف
يعني مثل ام تحب ابنها البار=ياللي معك مااسمع ولارا ولا اشوف
وبرغم ماعاني من جحود وانكار=ماهان قدري دامي احج واطوف
مع ان حظني كان لك مثل لاشجار=ظل ظليل ولقمة تشبع الجوف
مذنب كره نفسه بلحظات وانهار=لاهو بها يشفق ولاهي به تروف
شرهة عتب مدري ندم داخلي صار=مدري انا(آسف) او اني (بمأسوف)
(كش ياملك) مدام ساقتك لاقدار=وتضحك ودمع العين لناس مكشوف
يعني تحاول تدعي عزم واصرار=وانته مثل طير به الريش منتوف
حبيبتي طفلك رميتيه في النار=واثقتلي اكتافه معاذير وحلوف
وطفلك قسم بالله يابنت مابار=ولا تردى فيك لوطاح بظروف
مافي يده يختار لو قتلي اختار=وهو حقيقة بين نارين محذوف
ماباع لاعشره ولا حاز قنطار=غير التقى من رب منجي من الخوف
هو من حفظ عبده وهو داخل الغار=وطلابته تعدادهم وصل الوف